Arctic Umiaq Linemik pisiniarnermi salliutitsisoqartoqanngitsoq
Arctic Umiaq Linep tuniniarneqarnerani Namminersornerullutik Oqartussat naapertuilluanngitsuliorsimapput, taama Air Greenland Royal Arctic Linelu allakkatigut ammasutigut isornartorsiuipput. Angalatitseqatigiiffik piserusuttoq alla, Arctic Travel Group, salliutinneqarsimavoq uffalu Air Greenland, Royal Arctic Linelu, ukioq manna juulip naalerneranili pisinissamut soqutiginnillutik nalunaareersut. Arctic Travel Groupip pisissangatinneqarnera nalunaarutigineqarpoq, Air Greenland Royal Arctic linelu qanoq neqeroorutissaqarnersugut tusarniallaqqaannguarnata, Air Greenland taama isornartorsiuivoq. Tamannali eqqunngilaq, taama oqarpoq Naalakkersuisuungallartut siulittaasuat angalannermullu aamma naalakkersuisuungallartoq Hans Enoksen. Taanna oqarpoq Arctic Umiaq Line-imik pisinissamut soqutiginnillutik Air Greenland aamma Royal Arctic Line nalunaaramik piserusuttut allat mattunneqarsinnissaannik piumasaqarsimasut.
- Tunisiniarnermik imaluunniit ingerlatsiniarnermik tunngavilimmik oqaloqatigiinnerit suli ingerlapput, aamma suli aalajangersaasoqanngilaq kikkut tigumminnissanersut. Soorunami uagutsinnut soorunalumi inuiaqatigiinnut pingaarnerpaavoq Arctic Umiaq Linep naleqarnerpaalluni inuianniiginnarnissaanik aallaaveqarluni aaqqiinissaq.
Angalatitseqatigiiffiup Arctic Travel Groupip piserusuttutut kisimi taaneqarsimanera, taavalu piserusuttut allat Air Greenland aamma Royal Arctic Line ilanngullugit sooq taaneqarsimannginnersut aperigatsinni Hans Enoksen akivoq:
- Taamatut attaveqarnermi tunngaviunerpaapput akit kiisalu sumiiffiit tikittakkat sapinngisamik attanneqarnissaat. Akit ilaatigut akikillisinnaasut allaat Arctic Travel Groupimit oqariartuutigineqarnikuupput, taakkulu uagitsinnut tunngavigissallugit pitsaanerpaajusimapput, tassa akinik appasinnerusunik ingerlatsiumallutik neqerooruteqarusuttut aallaavigineqarsimapput.
Taamakkaaluartorli Air Greenland aamma Royal Arctic Line aprineqarsimanngillat qanoq neqerooruteqarniarnersut. Tamatumunnga Hans Enoksen ima akissuteqarpoq.
- Tusarniaaffigineqarnikuupput namminnerlu soqutiginninnertik oqaatigiartornikuuvaat, taakkulu saniatigut allat tassa Norgemiut takornariartitseqatigiiffiat aamma attaveqarnikuuvoq. Kisiannili ilisimatinneqarnikuuvugut allanik saaffiginnittoqassappat namminneq ingerlatsisinnaanertik ingerlassinnaassanngikkitsik.
Tassa imannak nipineqartumik uagut kisitta ingerlatsuisariaqarpugut allallu aperineqartariaqanngillat. Soorunami taanna uagut tulluartuutissimanngilarput, sapinngisamik aki pitsaanerpaaq aamma uagut angorusukkatsigu, Hans Enoksen oqarpoq.
Isumaqarnerarpoq taamatut namminersortunngorsaaniartarneq killiffiginaversaarneqartariaqartoq.
- Sapinngisamik unamminikkut minnerunngitsumillu inuiannut akikinnerpaamik ingerlatsiviusinnaasut aallaavigineqartariaqarput.
Arctic Travel Group ilaatigut timmisartuutileqatigiiffiup Air Alphap ingerlatseqataaffigisaa oktobarip 14-ianni pisinissamut soqutiginnilluni nalunaarsimavoq. Arctic Umiaq Linemik piserusuttut tamat pingasunngorpat oktobarip 26-ianni Namminersornerullutik Oqartussanit akineqarsinnaanissaat Hans Enoksen-ip neriuutiginerarpaa.
