Nunavumi sakkunik ilinniartitsinissaq amigaataavoq
Nunavumi sakkunik, soorlu aallaasersornermik, ilinniartitsoqarpiartanngilaq, Nunatsiaq News taama tusarliussivoq. Nunavumi sakkunik, soorlu aallaasinik, ilinniartitsisussat atuakkallu ilinniartitsissutaasinnaasut amigaataaqaat.
Nunavumi inuit, nunatsinnisulli, piniutinik, soorlu aallaaserpassuaqarput, oqaatigineqarporlu Nunavut Canadami aallaseqarfiunerpaamut tulliusoq.
Nunavut North West Territoriamut atajunnaarmat piniutinik sakkunillu atuinermik ilinniartitsineq uniusavissimavoq.
Namminneq piumassutsiminnik ilinniartitserusuttut kisimik, sakkulersornermut maleruaqqusat tungaasigut, massakkut ilinniartitsisorineqartartut oqaatigineqarpoq.
Sakkulersornermut atatillugu Inuktitut allassimasunik aamma atuagassiaqanngilaq, ilinniartitsiniarnerillu naalakkersuisunit tapersersorneqaratik ingerlarpalupput.
Nunavumi nammineq piumassutsimik sakkunik ilinniartitsisartoq Nunatsiaq Newsimut oqarpoq, Nunavumi inuusuttut sakkunik atuinissamut ilikkanngitsoornissaat assut ernumanartoq.
