Ilulissat Kommuneat 4,2 millioni koruunik akiliisussanngortitaavoq

Ilulissat Kommuneat 4,2 millioni koruuninik akilisitaasussanngorlugu Ilulissani eqqartuussivimmi sapaatip akunnerata siuliani eqqartuunneqarpoq. Kommunemi qangali suliassaq, tassa nunamik agguaassinissaasimagaluarneq pillugu eqqartuussisoqarpoq.

Maluginiagassaq tassaasimavoq, Ilulissat Kommuneanni akisussaasut eqqartuussivimmut takkutinngitsulluunniit eqqartuussut nalunaarutigineqarmat.

Ilulissat Kommuneat eqqartuussivimmut agginngitsoortutut eqqartuussummik ilumut tunineqartoq, eqqartuussivimmi sulisup Christina Fleischerip uppernarsarpaa, kommunimmi eqqartuussaanissaminik nalunaarfigineqarnerminiit sassaqqusissummut suliassanngortitsineq oqaaseqarfigissallugu sapaatip akunnerini sisamani eqqarsarfissaqarfigisussaagaluarpaa. Eqqartuussivik sapaatip akunnerini sisamani utaqqereerluni tusagaqannginnami, Ilulissat Kommuneat agginngitsoortutut pisarneq malillugu eqqartuussummik tunivaat, tassalu suliassiisoq 4,2 millioni koruuninik taarsiivigisussanngorlugu.

Suliassanngortitsinermut kommunep sapaatip akunnerisa sisamat ingerlaneranni ajoraluartumik maalaaruteqarsimannginnera borgmesterip Anthon Frederiksenip uppernarsarpaa.

- Kommunip Teknikimut Ingerlatsiviani pisortaq paasissutisseeqqullugu suliassinneqarsimagaluarpoq, taamaaliorsimanngilarli, Anthon Frederiksen Radioaviisimut ullumi oqarpoq.

- Soorunalimi pisoq uanga nammineq - kommunillumi - akisussaaffigaarput.

- Eqqartuussut suliareqqitassanngortipparput, Eqqartuussiviullu suliaq Landsretsimut ingerlateqqippaa, Anthon Frederiksen oqarpoq.

Kommunep eqiattarnersua Siumut sinnerlugu Ilulissani Kommunalbestyrelsimi ilaasortap, Johanne Olsenip,

puffassimaarutigaa, isumaqarporlu kommunalbestyrelsemut ilaasortat pisoq pillugu iluamik paasitinneqarsimanngitsut.

- 4,2 millioni koruunit taakku akileraartartut aningaasaatigaat, kommunemi akisussaasut innuttaasunut politikerinullu qinikkanut akisussaassuseqanngitsuliorput, Johanne Olsen oqarpoq.

- Qineqqusaartoqarmanuna illuatungiliuttut taamarsuaq qisuariartut, Anthon Frederiksen oqarpoq.

- Kattusseqatigiinni siulittaasutut akornusernissara kisiat illuatungiliuttut anguniarpaat, Anthon Frederiksen ualimut oqarpoq.

Oqallinneq ataasinngorpat nanginneqassaaq, kommunalbestyrelse ammasumik ataatsimiilerpat pisoq pillugu Siumut saqqummiiniarpoq.

- Akisussaaffimmik tunineqartariaqarput, Johanne Olsen oqarpoq.