Peqqinnissaqarfimmi sulisut kalaallisut pikkorissarput

Peqqissaanermi Ilinniarfimmi sinerissami Nuummilu peqqinissaqarfinni sulisunik kalaallisut oqaatsivut atorlugit pikkorissaasoqarpoq. Pikkorissaaneq ” Peqqinnerulernissamik siuarsaaneq pinaveersaartitsinerlu” qulequtaralugu ingerlanneqarpoq.

Pikkorissartitsinerup siunertaraa peqqinnerulersitsiniarluni suliami peqataasut pikkorissuseqarnerminnik ineriartortitsinissamut periarfississallugit, aammalu peqataasut attaveqatigiinnermi siammarsaanermilu piginnaasaat ineriartortissallugit.

Peqataasut 22 - iusut sineriammi illoqarfinni assigiinngitsuni napparsimaveqarfinni, peqqissaavinni aammalu kigutileriffinni sulisuusut pingaarnertut sammivaat katsorsaaneq, pinaveersaartitsineq aammalu peqqinnerulernissamik siuarsaaneq. Pikkorissartut aamma ilinniarpaat ulluinnarni sulinerminni oqaloqatiginneriaatsit attaveqaqatigeeriaatsillu.

Pikkorissartut peqqinnissaqarfiup iluani imikkoortortaqarfiit akimorlugit pitssanerusumik suleqatigiissinnaaneq paaseqatigiissinaanerlu aamma pikkorissarnerminni sammivaat.