Kalaallit illersornissaq pillugu isumaqatigiissummut peqataatinneqanngillat

- Qaartartunut ungasissunut igeriuttakkanut illersornissaq pillugu Danskit suleqataaffigisaannik Amerikamiut isumaqatigiissutaat nunatsinnut attuumassuteqanngilaq, taama oqarpoq, nunanut allanut pisortaqarfimmi pisortaq Inuuteq Olsen.

- Maanngaanniit isumaqatigiinniarnerit malinnaaffigivagut, kisianni nalilerparput annerusumik soqutiginaateqanngitsoq. Tassami nunatsinni teknikkimut tunngasunik aammalu illersornissaq pillugu teknologi atorlugu sulialinnik suliffeqarfeqanngilaq peqataajartortinneqarsinnaasunik, Inuuteq Olsen oqarpoq.

Nangipporlu:

- Isumaqatigiissut atsiorneqarsimasoq taanna imaqarpoq, kalaallit suliffiuteqarsimagunik aamma peqataasinnaasut, nunatsinnili suli suliffiutit taama ittut piunngimmata taamaaliortitsisinnaanngilavut, oqarpoq.

Taassuma neriuutigaa siunissami suliffiuteqartoqalissappat kalaallit taama ittunut isumaqatigiinnernut peqataatinneqartalissasut.

Qaartartunut ungasissunut igeriuttakkanut illersornissaq pillugu Danskit peqataatinneqaraluartut taamaattoq nunarput maannakkuugallartoq tamatumunnga attuumassuteqannginnera erseqqisaatigineqarpoq.