Igasut arfinilissaa unammersualerput
Kalaallit Nunaani igasut arfinilissaa imminnut unammersuartussanngorput, tamanna pissaaq ullut 14-it qaangiuppata, oktoberip ulluisa 29-ianni, Inussutissalerinermi Ilinniarfimmi, Inuilimi, Narsamiittumi.
Nunatta pissarititai atorlugit inunnut arfinilinnut kissartunik igasoqassaaq. Taamatullu amerlatigisunut kinguleqqiutissat, minnerpaamik kinguleqqiutini marluusuni, nunatta pissarititai atorneqassallutik.
-Igasoq ilisarisimaneqarluartoq Erwin Lauterbach, Hellerup –mi neriniartarfiit ilaanni, Saison –mi, igasuusoq, naliliisartunut ilaassaaq. Lauterbach igasutsialaavoq ilisarisimaneqarluartoq aamma nerisassioriaatsinut tunngasunik aamma atuakkiaqarluni, Inuilimi inspektøri Morten Mikkelsen oqarpoq.
Morten Mikkelsen nammineq aamma dommerioqataassaaq, faglærer Marie Tofdahl, tassumalu uia, forstander Esben Toftdahl peqatigalugit
-Nuna tamakkerlugu igasutut ilinniartut aamma imminnut unammiuaarnissaannut periarfissippavut, siorna siullermeerlutik unammipput. Tamanna pissaaq oktoberip ulluisa 27-ianni, Morten Mikkelsen oqarpoq.
Igasutut ilinniartut ilinniarnertik sumut killikkaluarunikkuluunniit peqataasinnaapput.