KNR-ip nittartagaatigut piffissami kingullermi assigiinngitsunik qulequtserlugit isumasiuisaqattaarpugut.
KNR-ip siunertaqapilulluni taamatut isumasiuisimasutut pasineqareerluni maanna isumasiuisarnini unitsippaa.
Inatsisartunut qinersinissaq avammut nalunaarutigineqarmalli KNR-ip nittartagaatigut qinersinissaq pillugu assigiinngitsunik qulequtserlugit apeqquteqaqattaarpugut.
Nittartakkatsinnik atuisut apeqqutinik taasisinnaatitaapput.
Tamannali isumasiuinerunngilaq nittartakkamillu atuisinnaasut kisimik taasisinnaapput.
KNR-ip ilaatigut apeqqutit makkua apeqqutigai:
Qinersinermi suna pingaarnersaava? Partiit sorliit qinersisoqareerpat naalakkersuisooqatigiilissappat? Kiisalu Partii sorleq qinissaviuk?
Apeqqulli kingulleq apeqqutigineqartorlu ajutoorpugut.
KNR-ip nittartagalerisua, Martin Chemnitz ima oqarpoq:
- Isumasiuipallanneq ”Quickpoll” ulluni kingullerni ingerlanneqarsimasut, ingerlallualeruttortut malugivarput, inuit teknikki atorlugu arlaleriarlutik taasisarsimasut. Isumasiuipallanneq aaqqitaavoq inuit ataasiakkaat kikkuuneri takusinnaanatigit, Martin Chemnitz oqarpoq.
Nangipporlu:
- Taamatut taasineq imatut paasisassaavoq qarasaasiaq aqqutigalugu taasinerussasoq, oqarpoq.
Martin Chemnitz aamma erseqqissaavoq, inuit ataasiakkaat taama innimiilliornerat peqqutaalluni, nittartagaq aqqutigalugu inunnik isumasiuinermik periarfissiineq matuneqartariaqalersoq.
Nittartagaq siullermeerluni atornerlunneqanngilaq.
Aviisi nittartakkami saqqummersittagarput KNR-illu tamanut oqallittarfia siornatigut aamma matuneqartariaqarsimapput. Kukkusumik quppersagaq atorneqartarsimavoq inuillu ataasiakkaat kusanaatsuliorfigineqartarlutik.
KNR-ip oqallittarfia nutaamik isumannaallisaaserneqarsimalluni qanittumi ammaqqissaaq.