Atassutip qinigassanngortittussatut piukkussai inuit 43-t maanna nalunaarutigineqarsimalerput. Jakob Sivertsenillu aqqa taakku akornanniinngilaq.
- Immikkoortortaqarfiit taakkua innersuussutigaat. Taakkulu kattuffimmut maanga nassiussuunneqarput, maannakkuugallartorlu ukua allassimasut siullertut akuerigallarpagut, Finn Karlsen oqarpoq.
Taanna erseqqissaavoq aqqit taakku akornanni nutaartaqangaatsiartoq.
- 2002-mut sanilliullugu nutaarpassuupput, ilaatigullu 19-iinnarnik ukiulinnik aamma ilaqarput, soorunami aamma utoqqartaqarput akuleriipput, oqarpoq.
Ualimut ullo´qeqqanut radio aviisimi tusarliupparput, ATASSUT-ip immikkoortortaqarfiani siulersuisut nalunaarsimasut Jakob Sivertsen qinigassanngortissallugu pilersaaruteqaratik, tamannalu aamma piviusunngornavianngitsoq.
Tamatuma kingorna Jakob Sivertsen radio aviisimiit oqaloqatigaarput.
- Atassut qanorluunniit oqaraluarpat nammineq qinigassanngortissinnaanissara pisussaaffigaara. Taamaattumik qinigassanngortinnissara naatsorsuutigaara, Jakob Sivertsen radio aviisimut oqarpoq.
Sapaatip-akunnerani kingullermi Jakob Sivertsen imigassartorsimalluni timmisartumut Kulusummukartumut ikeqqusaannginnami kamassimavoq, taamaalilluni Kangerlussuarmi isertitsivimmiitinneqarnermi kingorna qinigassanngorteqqinniarnani nalunaarsimagaluarluni.
Jakob Sivertsenip isummaminik allanngortitsisimanera pillugu Atassutip siulittaasuanut Finn Karlsenimut akissutissarsiniaraluarparput.
- Atassummiit taanna akuerinavianngilarput, tamannalu aamma oqaatigereerparput, Finn Karlsen oqarpoq.
Atassut tunuliaqutaralugu Inatsisartuni ilaasortaareersut sisamat tassaapput:
Finn Karlsen, Ellen Christoffersen, Augusta Salling kiisalu Godmann Rasmussen.
Finn Karlsen aamma erseqqissaavoq, qineqqusaarutiminni ilinniartitaaneq pingaarnertut salliutikkitsik.
- Nunatsinni ilinniarsimanngitsut amerlaqaat, iliuuseqarfigineqartariaqarpullu, Finn Karlsen oqarpoq.