Aalisarnermut Piniarnermullu Ilinniarfik pisariaqartinneqarpa
Aalisarnermut Piniarnermullu Ilinniarfimmik aallartitsisoqassanersoq misissorniarlugu ataatsimiititaliaq Sisimiuni tallimanngormat oktoberip 7-anni ataatsimiippoq.
- Kommunit aalisarnermik piniarnermillu ilinniarfimmik pisariaqartitsinersut tusarniaavigeqqaassavagut, ataatsimiitsitaliap siulittaasua aamma KNAPK-mi pisortaq Peter S. Olsen oqarpoq.
Ataatsimiititaliaq 2004-imi januaariugaa pilersinneqarpoq. Paamiuni Umiartornermut ilinniarfimmit, Maniitsumi aalisarnermut ilinniarfimmit, KNAPK-mit, APK-mit kiisalu pisortaqarfinnit suliamut attuumassuteqarsinnaasunit inuttalersorneqarpoq.
Ataatsimiititaliaq inatsisartut ukiakkut ataatsimiinnissanni 2006-imi piniarnermut aalisarnermullu ilinniarfiliortoqassasoralugu siunnersuusiussaaq.
Sisimiut kommuneat ataatsimiinnermi peqataasoq piniarnermut aalisarnermullu ilinniarfimmik pilersitsivigineqarnissaminik soqutiginnilluni nalunaaruteqarpoq.
Piniarnermik aalisarnermillu ilinniarfimmik pilersitsinnisaq IA-p inatsisartuni ilaasortaatitaanit Agathe Fontainimit siunnersuutigineqarpoq. Taamatut ilinniarfiup pisariaqartinneqartup inuusuttut allanik iluanaarutaasinnaasunik nassaassarsiorsinnaanerinut ilinniartissinnaagai Agathe Fontain isumaqarpoq.
- Piniartutut inuutissarsiuteqarneq allanngorartuarpoq silaannaap allanngorarnera pissutigalugu. Ilinniarnerup imarisinnaavaa saniatigut inuussutissarsiutaasinnaasunik ujaasisinnaaneq, assersuutigalugu takornarianik angallassisarnissaq imaanilu isumannaallisaanermik ilisimasaqarnerulernissaq Agathe Fontain oqarpoq.