Siku saaliartuinnarpoq
Issittumi siku ukiut sisamassaa ingerlaannartumik aatsaat taama nungukkiartortigisimavoq, taama allappoq Canadami aviisi Nunatsiaq News.
Ukiup sikua aamma milliartorpoq upernaakkullu aakkiartortarnera siusilliartuinnartoq oqaatigineqarpoq. USA-mi aput sikulu pillugit misissuiviup, NASA-p, aamma Washington Universitetip misissuinerisa tamanna takutippaat.
Issittumi immap sikua aasaq tamaat aareerluni septemberip qaammataani saannerpaaffissani tikittarpaa. Ukioq mannali septemberimi aatsaat taama saatsigisimavoq, qaammataasiat atorlugit 1978-imili misissuisoqartalermalli aatsaat taama saatsigisimalluni.
Ukioq aamma nalunaarutigineqarpoq, ukiup sikua qangatuut utersimanngitsoq. Ukiukkut sila nilleraangat siku nalinginnaasumik utertaraluarpoq.
Qaammataasiat 2002-imili aamma uuttorsimavaat, Alaskap Sibiriallu avannaatungaanni siku assut siusissukkut aattartoq. Issittumi tamarmi sikup aalernera ullunik 17-inik siusinnerusukkut pisimavoq.