Europamiut satellitsiat CryoSat nunani issittuni sikunik nalunaarsuisartoq aallartinneqaqqammitsiarluni tammarsimasoq, europamiut avataarsuarmik nakkutilliiviat nalunaarpoq.
Satellitsip taassuma seqummai Kalaallit Nunaata avannaa tungaanut nakkarsimasorineqarput.
Satellitsip sumorpiaq nakkarsimanissaa suli iluamik ilisimaneqanngilaq, ilimagineqarporli imaanut nakkarsimassasoq.
Satelitsi aallarsimatsiarluni nakkarsimanerata sumik peqquteqarsimasinnaanera misissuisut maanna misissorpaat.
Satellitsip taassuma ukiuni pingasuni nunarsuarmi nunat issittut sikuisa issussusaat uuttortartussaagaluarpaa. Ilisimatuullu misissuinerit tamakku, silap allanngoriartornerata sumik peqquteqarsimasinnaaneranik misissuinerminni iluaqutiginiartussaagaluarlugit.
Nunarsuup silaannaata misissorneranut Kalaallit Nunaata sermiata misissornissaa pingaaruteqarsimaqaaq, tassami sermersuup misissornissaa imaannaasimanngeqimmat.