Qaammatip tulliata naanerani Aasianni raajaleriffik matuneqassaaq. Uuliap akia qaffakkaluttuinnarpoq, raajallu tunisassiarineqarnerini naleerukkaluttuinnarlutik, taamaammat Royal Greenland-ip raajaleiffii ikilisinneqalerput.
Royal Greenland-ip iluani sipaarneq ingerlanneqalermat, Aasianni raajalerineq Ilulissanut Sisimiunullu nuutinneqassaaq.
Taamaattoqarnerata kinguneraa, Aasianni inuit 50-it suliffissaaleqilernissaat. Inuit ilaat Ilulissanut sisimiunulluunniit nuukkusuttut nuutinneqassapput, ukiullu naajartorneranut inuit Aasianni raajaleriffimmi suliffissaaleqilersussat Royal Greenland Academy-mi pikkorissartinneqassapput.
SIK isumaqarpoq pikkorissaaginnartoqarani ilinniartitseqqiinerit allaanerusut ingerlanneqartariaqartut, tamannalu Aasianni raajaleriffiup usingiaasartuisa sinniisaata Jens Hansen-ip isumaqatigaa.
- Taanna periarfissaq iluatinnartorujuuvoq, sulisut inuusukaarpassuungamik, taamatut periarfissinneqassagunik nalunanngilaq tigulluartorujussuusinnaagaat. Aamma sulisut utoqqarujussuartaqanngillat. Kisianni oqarfigineqanngilagut ilinniaqqiffiusinnaasunut tunngasunik, taamaallaat Royal Greenland Academy-mik taaneqartartumik pikkorissartinneqassaagut qaammatini marlunni, allanik periarfissanik oqaaseqartoqanngilaq, Jens Hansen, aasianni raajaleriffimmi usingiaasartut sinniisaat oqarpoq.
Aasianni saattuanik tunisassiorneq saattuanik tulaassisoqartuartillugu tunisassiorneq ingerlaannassaaq.