Timmisartumi nassatat suli misissorluarneqarnerulissapput
Nunatsinniit Danmarkimut uterlugulu timmisartukkut Kangerlussuaq aqqusaarlugu angalasussat Københavnip tungaanut aallarniarnerminni kinguaattoortarnissartik piareersimaffigisariaqarpaat.
Naalagaaffiup Timmisartortitseqatigiiffiata tamanna ullumikkumiit atuutsilerpaa.
Tassa imaappoq, nassatat suluusalimmut Dash-7-mut imaluunniit qulimiguulimmut ilaallutik Kangerlussuarmut tikittut, timmisartorsuarmut Danmarkiliartussamut issorarneqartinnatik suli ataasiarlutik misissoqqinneqartalissapput.
Tamannalu pissaaq nassatat aallariartorfimmi misissorneqareersimagaluarpataluunniit.
Sillimaniarneq pillugu inatsisit sukannernerulersinneqarnissaannik nalunaarut Air Greenlandip tallimanngormat aatsaat tusarpaa, Naalagaaffiullu Timmisartortitseqatigiiffia suleqatigalugu nassatat immikkut misissoqqinneqartalernissaannut periusissamik nutaamik maanna pilersaarusiorput.
Københavnimukarniartut suut tamarmik aaqqinneqarnissaasa tungaannut kinguaattoortarnissartik tassa naatsorsuutigisariaqarallarpaat. Air Greenlandimi tuniniaanermut pisortap, Jesper Kunuk Egedep, naatsorsuutigaa nalunaaquttap akunnerata ataatsip missaanik kinguaattoortoqarsinnaasassasoq.
Narsarsuakkoorlutik Danmarkimut angalaniartut kinguaattortariaqartassanngillat, nassatammi timmisartorsuarmut Danmarkiliartumut issorarneqannginneranni taqqavani misissoqqissaarneqareertarmata.
