Isumamik allanngortitsineq

Naalakkersuisut siulittaasuat, Hans Enoksen, Inuit Ataqatigiillu siulittaasuat, Josef Motzfeldt, ualimut ataatsimeeqatigeereerlutik, IA-p piumasaqaatigisimasani, tassalu Siumup Naalakkersuisunngortitsiniarnissaanut sunneeqataarusunnertik allanngortippaat.

- Qinersereernerup kingorna Naalakkersuisunngortitsinermi taavalu aamma maanaannakkut Naalakkersuisunik taarsiisoqartariaqaleraangat, periutsit suut illuatungeriilluta atortarsimanerigut saqqummiuppagut. Uagut Inuit Ataqatigiinni periuseraarput siulersuisuunerit taavalu aamma inatsisartuni ilaasortaatitagut ataatsimoorluta kikkut naalakkersuisunngortussat akuerisarlugit. Periuseq taamaattoq ulloq manna tikillugu Siumup atortarsimanngilaa. Taamaammat uagutsinnut angusaq imaannaanngitsoq tassaavoq, Siumup siulittaasuata pisut kingulliit eqqarsaatigalugit soorunami siulersuisuunini aammalu inatsisartuni ilaasortaatitani isumaseqqaarlugit aammalu akuersiteqqaarlugit, naalakkersuisunngortussanik toqqaasarnissani piviusunngortinnialermagu. Taamaalilluni patajaannerusumik toqqammaveqarluni naalakkersuisunngortitsinermi periuserineqartussat isumaqatigiissutigineqarmat, Inuit Ataqatigiit sunniuteqaqataanissamik piumasaqarnerput, annertuumik timitaliivigineqartutut oqaatigisariaqarpoq.

Josef Motzfeldt siusinnerusukkut Hans Enoksen-mut piumasaqaraluarpoq, Naalakkersuisunik nutaanik Siumut toqqaalerpat, IA aalajangeeqataatinneqassasoq, taamaanngippallu qinersisariaqalersinnaaneq pisariaqalersinnaasoq, taamatulli piumasaqarneq allanngorpoq.

- Uanga taanna susassaqarfiginngilara,, taamaammat Naalakkersuisup siulittaasuata siulersuisuunini taavalu gruppini qularnanngitsumik peqatigalugit inuttassanik toqqaanissani isumagisussaassavai. Partiip suleqatigisatta siulersuisuuneri inatsisartunilu gruppia qularnaveequtitut qularnaarutsigu, uagut suniuteqarnissarput annertunerusussaanngitsutut nalilerparput, Josef Motzfeldt naggasiivoq.

Josef Motzfeldt, aamma neriunnerarpoq Siumumi naalakkersuisuutitat naapertuilluarnerullutik ingerlatsisalerumaartut, siusinnerusukkullu aqutsisarsimanermit pitsaanerusumik aqutsisoqarnissaa IA-p neriuutigaa.

Hans Enoksen oqaloqatigineqarnissaminut piffissaqanngimmat oqaloqatigisinnaasimanngilarput. Septembarilli qulingani Naalakkersuisussat toqqarneqarsimassasut oqaatigaa.