Nunat Avannarliit Killiit: Takornariaqarneq oqaluuserisassanngortinneqarpoq
Nunat Avannarliit Killiit ukiumoortumik ataatsimeersuarnerminni Islandimi Isafjodurimi ingerlanneqartumi aalajangiuppaat, takornariaqarneq ataatsimeersuarnissap tulliani oqaluuserineqassasoq. Ataatsimeersuarnissaq aappaagu 2006-imi junimi ingerlanneqassaaq.
Takornariaqarnerup qanoq ililluni siuarsarneqarnissaa nunat avannarliit qanoq suleqatigiissutigisinnaaneraat, aamma takornariaqarneq Nunat Avannarliit qanoq annertusarsinnaaneraat apeqqutinut pingaarnernut ataatsimeersuarnermi ilaassaaq.
Silaannaap allanngoriartornera, nunani avannarlerni inuiaqatigiinnut tamanut eqquisoq, ataatsimeersuarnissami tulliuttumi oqaluuserineqassasoq, Savalimmiormiut peqataatisaasa siunnersuutigigaluarpaat.
Kisianni tassa takornariaqarnerup oqaluuserineqarnissaanik kalaallit islandimiullu siunnersuutaat akuersissutigineqarpoq. Ataatsimeersuartoqaqqinnissaatali tungaanut Savalimmiut siulittaasuussapput.