Umiarsuit sorsuutit Tartupalummukarnerat Danmarkimit ernummatigineqanngilaq

Tartupaluup – Hans Ø-p- pilerngunneqarnerani, umiarsuarnik sorsuutinik marlunnik Canadap Tartupalummukartitsinera Nunanut allanut Tunngassuteqartunut Danmarkip ministeriata, Per Stig Møllerip, eqqarsarnartoqartinngikkaa, Danmarkimi nunanilu allani tusagassiuutit arlallit allaaseraat.

- Tartupalummi suliassaqarlutik umiarsuit aallartinneqanngillat. Amerikamuna avannaatungaani aqqut, tassa Nordvestpassage, canadamiut soqutigigaat, tamaammaat tamaannarnertik maluginiaqqullugu, Per Stig Møller oqarpoq.

Tartupaluk pillugu assortuunneq, Danmark Nunarpullu sinnerlugu Canadap oqartussaaffigerusutaa, kingumut sakkortuseqqippoq, Illersornissamut canadamiut ministeriat qaammat kingulleq qeqertamut tassunga niusimammat canadamiullu erfalasuat amullugu.

Danmarkimit tamanna assuarlerneqarpoq, maannalu tassa canadamiut danskillu nunanut allanut ministerii septemberimi ataatsimeeqatigiinnialerput, aaqqiissutissamik isumaqatigiinniassallutik. Isumaqatigiinniarneq iluatsinngippat, suliaq Nunarsuaq tamakkerlugu Eqqartuussivissuarmut ingerlateqqinneqassaaq.