Isikkamik arsaalluni Uummannami unammersuartoqalerpoq
Angutit isikkamik arsaattartut Uummannap eqqaani Ikerasammiut Nunatsinni isikkamik arsaalluni unammersuarnermi ullumi Uummannami aallartinneqartussami unammeqataasinnaanngoriasaarput.
Taamatumunnga pissutaavoq K 33 Qaqortumeersup silarluppallaarnera pissutigalugu Uummannamut apuussinnaajunnaarsimanera. K 33-ermiut namminneq angallatiminnik Nuummukariarlutik timmisartumut ilaallutik Uummannamut ingerlaqqittussaasimagaluarput.
Holdit katillutik arfineq-pingasut unammersuarnermi peqataassapput. Pulje 1-mi Aasiak-97, Malamuk, B-67 aamma Kâgssagssuk unammissapput. Puljep aappaani G-44, Ikerasak, N-48 aamma UB-68 unammissallutik. Semifinaalit ataasinngorpat ingerlanneqassapput marlunngorpallu pissartannguniutivinneq ingerlanneqassalluni.
Unammersuarnermi ammaanersiorlutik unammissapput Aasiak-97 aamma Malamuk, taakku unamminerat KNR-ikkut toqqaannartumik aallakaatinneqassaaq.
