Politiit misissuinialernerat

Ilassinninnermut aningaasanik atuivallaartoqarsimanera aallaavigalugu politiit misissuilernerannut atatillugu paasiniarneqarpoq, atorfilittatut pisinnaatitaanermilluunniit atornerluisoqarsimanersoq.

Jens Napaattuup Rasmus Frederiksen-illu ilassinnissutinik atuivallaarsimanerat pillugu politiit misissuiniarnerat, Hans Enoksen-ip ernumanartoqartinngilaa, pinerluuteqarnermut inatsisit unioqqutinneqarsimanngimmat.

Inuit Ataqatigiit sinnerlugit, Aningaasaqarnermut Naalakkersuisuusoq Josef Motzfeldt, isumaqarpoq politiit misissuiniarnerat pissusissamisoortoq. Josef Motzfeldt aamma isumaqarpoq, politiit inatsisilerituullu suleqatigiillutik misissuigunik angusaqarnerussasut.

Politiit namminerisaminnik misissuinialernerat aallaaveqarpoq naatsorsuisartut Deloitte, misissuereerluni saqqummiinerata kingorna.

- Misissuisoqarsimanerani inerniliinerit ilaanni allassimasoqarpoq atornerluisoqarsimasoq, taamatullu oqartoqarnerata kinguneranik, immikkut misissuinissaq aalajangersimavara, politimesteri Anders Linnet oqarpoq.

Ilassinninnermut aningaasartuutaasarsimasut pillugit pappialat paasissutissasut maannamut Politiinit tiguneqareerput, taakkualu maannakkut politiinit misissoqqissaarneqalerput. Anders Linnet-ip ullumikkut oqaatigisinnaannginnerpaa, suliaq qanoq inerneqarumaarnersoq.

Maleruagassanik unioqqutitsisoqarsimassappat, aningaasat atornerlunneqarsimasut utertinneqassapput, akiliisitaanermillu kinguneqarsinnaalluni.