Atorfillit Kattuffiat naalakkersuisullu isumaqatigiiissuteqarput

Atorfillit Kattuffiata, AK-p, naalakkersuisullu akornanni atsioqatigiittoqarneratigut suleqatigiinnissamik ullumi isumaqatigiittoqarpoq.

Ilinniartitaaneq pillugu annertunerusumik qaammarsaasoqarnissaa ilaatigut isumaqatigiissutaavoq, kommunilli kattussuunneqarnissaannut tunngatillugu atorfillit kattuaffiat atsioqatigiissinnaanissamut piumasaqaateqarsimavoq:

- Sulisut piginnaatitaaffii isumaqatigiissutissatut siunnersuummi ilaatinneqassanngitsut naalakkersuisunit piumasaqaataasimavoq. Taannali maanna ilaatinneqarpoq, atsioqataajumalerpugullu, Atorfillit Kattuffianni siulittaasoq Erik Hammeken oqarpoq.

Kommunit kattussuunneqarnissaat siunertaammat, atorfillit atugaat aaqqiiviginiarsimavagut. Kommunit kattussuunneqalerpata torersumik, illuatungeriit tamarmik naammagisinnaasaannik aaqqiissuteqarnissaq angorusullugu, Erik Hammeken oqarpoq.

Inatsisartut siunniussaat, tassa namminersornerup anguniarneqarnissaannik oqariartuut, Atorfillit Kattuffiannit tapersersorneqarpoq, annertunerusumillu piginnaanngorsaasoqaqqinnissaa Atorfillit Kattuffiannit AK-mit taperserneqarluni.

Atsioqatigiinnermi najuuttut tassaapput Atorfillit Kattuffianni siulittaasoq Erik Hammeken, suliffeqarnermut naalakkersuisoq Johan Lund Olsen kiisalu naalakkersuisut siulittaasuat Hans Enoksen.

Namminersorneq pillugu annertunerusumik qaammarsaasoqarnissaata saniatigut kommunit kattussuunneqarnissaat sammineqarpoq.

Naalakkersuisullu siulittaasuat Hans Enoksen ima oqarpoq:

- Kommunit kattussuunneqarnissaat aallaavigalugu, Atorfillit Kattuffiat isumaata tusarnissaa pingaaruteqartorujussuuvoq. Atorfillit Kattuffiat sunniuteqarsinnaasutut inissisimavoq, ingammik namminersulivinnissamut eqqarsaat pigineqartillugu, Naalakkersuisut siulittaasuat Hans Enoksen oqarpoq.

Isumaqatigiinniuteqarfigineqartussanut tulliuttut tassaapput Kalaallit Nunaanni Sulisitsisut Peqatigiiffiat GA, KNAPK kiisalu suliniaqatigiiffik ”Nammineq”.