Akilinermi tuttut neqaat tunisassiariniarpaat
Tuttut umimmaallu neqaat avammut tunisassiarineqarsinnaanersut Nunavumi misissorneqarnialersoq, Nunavumi aviisi Nunatsiaq News allaaserinnippoq.
Hudsonip kangerliumarngani Coral Harbour-imeersut piniartut 55-it siorna misileraanerni peqataapput.
Taamanikkut tuttut 3800 missaaniittut pisarineqarput, neqaallu avammut tunisassiarineqarlutik.
- Siornatigut tuttut tunisassiariniarneqarsimagaluarput, iluatsinngittumilli, Nunavut aningaasaqarnermut angallannermullu pisortaqarfiani misissueqqissaartartoq Charles Hunter Nunatsiaq News-imut oqarpoq.
Nunavumi tunisassioriaraluarnermi siullermi kukkussutaasimanersut oqartussanit misissorneqassapput, nungusaataanngitsumik tunisassiorsinnaanissaq angujumaneqarmat.
Tuttup neqaata saniatigut, umimmaap neqaanik tunisassiornissaq misissuiffigineqassaaq.
Nunavup kitaani Cambridge Bay-imi umimmaat neqaanik tunisassiorsinnaaneq misissorneqarpoq.