Imaatigut angalanermi GPS naammanngilaq
GPS imaluunniit DGPS, Differential Global Positioning System, nunarsuaq tamakkerlugu sumiissusersiornermut atortorissaarut nunatsinni imaatigut angalasunit amerliartuinnartunit ukiuni kingullerni atorluarneqaleriartortoq, soorlu ikkarluit eqqarsaatigalugit sillimaniarnikkut kisiat atussallugu naammanngilaq.
Taama oqarpoq Maniitsumi piniarnermut nakkutilliisoq Jacob Heilmann. Taassuma piniarnermut nakkutilliisutut atorfini aqqutigalugu ilisimaarinerarpaa ukiuni kingulliunerusuni sumiissusersiornikkut atortorissaarutaannarnik naatsorsuuteqarlutik umiatsianik angalaniartartut amerliartuinnartut.
- GPS kisiat atussallugu naatsorsuutigineqarsinnaanngilaq, nunap assigi pisoqalinikut assilillugit immersorneqarnikuummat. Jacob Heilmann oqarpoq. Maniitsumiit Sisimiut tikillugit immap naqqa manna tikillugu sukumiisumik uuttortaavigineqarnikuunngilaq, Jacob Heilmann oqarpoq tamanna sinerissami ikkarlioqarfiunerpaanut ilaasoq.
GPS-it atussagaanni pinngitsoorani immap naqqanik itissusersiut Ekkolodi kiisalu radari soorlu taartumiluunnit sikunik ilulissanillu nalunaarsuisinnaasoq, minnerunngitsumillu nunamut nalusamut pigaanni ilisimasortaqartarnissaq pisariaqarluinnartut Jacob Heilmann erseqqissaavoq.