Partiit naalagaanngillat

Raatiuaviisimi aaqqissuisutut sulilersussaq, Johannes Mathiassen AG-mi ullumi saqqummersumi oqarpoq, tusagassiortut inuttarsiuivallaartut, misissuilluaqqaaratillu tusagassiuisartut. Taamatut oqarnera Demokraatinit ernumanartoqartinneqarpoq, Demokraatillu isumaqarput, Johannes Mathiassen raatiuaviisimi aqqissuisusutut sulilerpat, raatiuaviisimi tusagassiueriaatsimik killilersuisoqalissasoq, atorfinitsinneqarsimaneralu tunuartinneqartariaqartoq.

Demokraatit taamatut tusagassiutinut saqqummiussinerat, KNR-mi pisortaagallartup Erik H Larsen-ip ima nalilerpaa.

-Massakkut suliffimmini akissussaaffeqarnini ajunngilaq nakkutiginiarliuk. Uangalu Johannes Mathiasseni isumaqatigivara oqarmat tusagassiortut sissuertussasut malersuisuunatik. Kisianni pisortat aningaasaataannik atornerluisimaneq pillugu oqaaseqarnera isumaqatiginngilara. Tassami oqarpoq nakkutilliisut kukkusimasut. Uanga isumaqarpunga nakkutilliisuutitat naalakkersuinermik suliaqartunit atorfeqartinneqarput, suliaminnillu nakkutiginniniarunik naalakkersuinermik suliaqartunik akuersissummik peqqaartinnatik suliaqarsinnaanngillat.

-Isumaqarpunga Demokraatit partiilluunniit allat aalajangissanngikkaat kina raatiuaviisimi sulilissanersoq. KNR naqisimaneqarani tusagassiuisussaavoq, taamaammat naatsorsuutigaarput KNR-ip Johannes Mathiassen-mik atorfinitsitsisimanera akornutissaqanngitsoq, taannalu partiip arlaannaanulluunniit attuumassuteqarani sulinissaa naatsorsuutigaarput, Erik H Larsen, KNR-mi pisortaagallartoq naggasiivoq.

Johannes Mathiassen raatiuaviisimut oqarpoq,

sullitat aallaaviusussaasut, raatiuaviisimilu sulileruni arlaannaanut attuumassuteqarani tusagassiortutut suliumaarluni oqarpoq.