Oqariartuut atorluartariaqarsoraa
Ilulissat mittarfiata 1799 meterinik tallineqarnissaata 700 million koruuninik akeqassangatinneqartup Danmarkimit akileeqataaffigineqartariaqarneranik, Dansk Folkepartimeersup Walter Christophersenip, Folketingip Grønlandsudvalgiani ilaasortap Radioaviisimut ippassaq oqarnera, atorluarniartariaqartoq, Naalakkersuisut siulittaasuat aamma angallannermut naalakkersuisuugallartoq Hans Enoksen isumaqarpoq:
- Tunngaviatigut isumaqatigilluinnaqqissaarparput aningaasarsiorneq nukittorsarneqassappat, pingaartumik aamma Ilulissani mittarfik tallineqartariaqartoq. Soorunami danskit naalagaaffiat taamatut peqataajumassappat assorujussuaq uagutsinnut iluarlunilu anguniakkamik qanilliallatsitsisussaavoq. Hans Enoksen oqarpoq.
Hans Enoksenip aamma maluginiarsimanerarpaa, aaqqiiniarnerni assigiinngitsuni Folktingip Grønlandsudvalgia assut peqataarusuttoq.
- Taamatut piumassuseqarnera isumaqarpunga aamma uagut atorluarniartariaqaripput. Naalakkersuisut siulittaasuat erseqqissaavoq.
Grønlandsudvalgip siulittaasua Kuupik Kleist isumaqarpoq, tamakkununnga aningaasaliinissat toqqammaviatigut nunatta akisussaaffigigai. Apeqqutigineqarmat 700 million koruunit iluatinnaraluannginnersut akivoq:
- Tapiissutaasartut isumaqatigiinniutigineqarneranni taanna eqqartorneqarsinnaavoq. Kisianni uanga toqqaannartumik mittarfiup ataatsip Danmarkiminngaannit aningaasaliiffigineqarnissaa orniginartippallaanngilara. Kuupik KLeist taama oqarpoq.
Ilulissat Nuullu mittarfiisa tallinissaannik pisariaqartitsisoqarneranik ilaasortat paasinninnerat Lars-Emil Johansenip Grønlandudvalgimi ilaasortap nuannaarutigaa.
- Kisianni apeqqutit taamaattut kikkut sorliit aningaasartuutit akilissavaat, nunatsinni naalakkersuisut Inatsisartullu paaseqatigilluinnarlugit isumaqatigiinniutissaapput. Lars-Emil Johansen oqarpoq.
700 million koruunitsiarsuit Danmarkip akileeqataaffigigaluarpagit iluatinnannginnersoq apeqqutigineqarmat akivoq:
- Soorunami sumiluunniit aningaasat iluatigineqarsinnaapput, apeqqutaaginnartarporli naalakkersuinikkut qanoq ittunik pitutsinernik ilaqarnersoq. Lars-Emil Johansen erseqqissaavoq.