Atuakkiortut nutserisalissapput

Nunani avannarlerni killerni atuakkiortut Sisimiuni naapeqatigiinneranni atuakkiortut nunatsinneersut, Islandimiut Savalimiormiullu atuakkiaat, nunat taakku oqaasii atorlugit nutserneqartalissasut isumaqatigiissutigineqarpoq.

Nunani avannarlerni killerni atuakkiortut naapeqatigiinnissaat, nunani taakkunani kulturministerinit tapersersorneqarluni piviusunngortinneqarsinnaasimavoq. Ataatsimeeqatigiinnermi ataqatigiissaarisoq Jessie Kleemann oqarpoq, Nunatsinni Islandimi Savalimmiunilu oqaatsit atorneqartut ikittuinnarnit atorneqarmata ilisimaneqarnerulernissaq anguniarneqartoq.

- Oqaatsigut atuakkiortugullu ilisimaneqarpianngillat, Savalimmiormiut Isalandimiullu ilaatigut aamma taamaapput. Islandimiut siuarsimanerujussuupput, inuttussuseq atuakkioriaaaserlu eqqarsaatigalugit. Uagullu suleqatigiilluta atuakkanik nutserisarnerit annerunerisumik anguniarneqassapput, Jessie Kleemann oqarpoq.

Nunatsinnit atuakkiortut ilaat ataatsimeeqatigiinnermi peqataasoq, nutserisutut aamma sulisoq Kelly Berthelsen oqarpoq, nutserisarneq suleqatigiinnikkut piviusunngortinneqarsinnaasoq.

- Sulerusuttunik inoqarpat isumaqatigiikkaanni, nutserisussaqaraannilu, pisinnaasullu atorneqarluarpata ajornarnavianngilaq, Kelly Berthelsen oqarpoq.