Parisimi saqqummersitsilerneq

Naalagaaffiit peqatigiit ilinniartitaanermut, ilisimatusarnermut kulturimullu suleqatigiiffiata, UNESCO-p, Paris –mi pingaarnertut allaffiani H.C. Andersen pillugu saqqummersitsisoqarnera, Danmakimi kunngeqarfik sinnerlugu Kultureqarnermut Naalakkersuisup Henriette Rasmussen-p ammartussanngorpaa.

Tamanna pissaaq septemberip arfineq pingajuani.

”Allalluni asanninnertut ippoq”, saqqummersitsinerup qulequtarissavaa. Ullorlu taanna tassaavoq, nunarsuaq tamakkerlugu atuarsinnaanerup allassinnaanerullu ulluat.

Ulloq taanna nersornaasiisoqassaaq. Allassinnaannginnermik atuarsinnaannginnermillu ajornartorsiutip akiorniarneranut suliniuteqarsimasut pingasut nersornaaserneqassapput.

Ammaanersiornerup saniatigut Henriette Rasmussen –ip ataatsimeeqatigissavai Unesco –p pisortaanera aammalu nungusaataanngitsumik piujuaannartitsinerlu pillugu - silarsuarlu tamakkerlugu kulturikkut kingornussat pillugit suliniutillit.

H.C. Andersen pillugu saqqummersitsineq maannakkut Danmarkimi Thorvaldsen –ip katersugaasiviani takuniarneqarsinnaavoq.