Tunniutiinnarnianngillat

Ilimanami innuttaasut tunisassiorfitsik Nuka A/S-imit siorna tiguaat ukiorli siulleq iluattitsiffiunngitsumik ingerlasimavoq, qerititsivittaartoqarneratigulli Ilimanarmiut tunisassiorfitsik neriunartoqarnerusumik ingerlalersinnaasoq neriuutigaat:

Siorna Ilimanarmiut tunisassiorfitsik Nuka A/S-imit tiguvaat nammineerlutik piginneqatigiillutik ingerlatilerniarlugu.

-Tassa ukioq siulleq aalisarfik silalu pissutaallutik oqarsinnaavugut immaqa iluattitsinngitsoorpugut taamak oqaatigigaanni immaqa pitsaaneruvoq, tunisassiorfiup pisortaa Arne Lange oqarpoq.

Ilimanarmiut arfineq pingasut Iluliarmiullu sisamat piginneqatigiillutik Ilimanami tunisassiorfimmi ukiumut 4 tonsinik qullukkiortalerniarlutik pilersaarutigisimavaat.:

-Tunniutiinnassanngilagut ingerlaqqinnissatsinnut massakkut piareersimavugut aamma oqareernittuut qerititsiveqarnerit taakkua iluarseriarpata siumungaaq qaleralinnik pisiortulereernissarput aamma naatsorsuutigilluinnarparput, Arne Lange tunniutiinnarniannginnertik erseqqissarlugu oqarpoq.