Ikiorsiigasuarneq isumalluarnartoqartoq
Ukioq manna nunatsinni imminortut 36-nngoreersimapput. Paarisap nutaamik periaaseqarluni imminortarnerit ikilisinnialerpai, siullermik ukiuni tulliuttuni pingasuni.
Nalagaaffiit Peqatigiit peqqinnissakkut suleqatigiiffiata WHO-p najoqqutassiaa naapertorlugu imminortarnermut pinaveersaartitsinissamik pilersaarusiaq suliarineqarsimasoq, Paarisami allaffimmik pisortaq Bodil Karlshøj Poulsen oqarpoq.
- Tassuuma imarai innersuussutit arlaqartut, tassa katsorsaanerit, pingaarnerutilluguli pitsaaliuinerit piffiffinnilu suliniarnerup nukittorsarnissaannut aqqutissat, Bodil Karlshøj Poulsen nassuiaavoq.
Kangaatsiami imminortarnerup pitsaaliorniarneranut atatillugu tikeraartoqarsimavoq, Kujataani Aasiveeraqartoqarmat inuttut naleqassuseq pillugu paasitsitsiniaasoqarsimavoq, taqqavanilu kommunit tikinneqasimallutik. Aamma Maniitsormiut suliniarnerat nangeqqittussanngorlugu septemberimi ikiuutissallutik Bodil Karlshøj oqarpoq.
Piffinni imminorsimasoqartillugu nuna tamakkerlugu piareersimasuutitat saniatigut aamma orniguttarsinnaallutik Bodil Karlshøj Poulsen erseqqissaavoq, apeqqutaatillugu kommunit orninneqarnissamik qanoq pisariaqartitsitiginerat. Siornatigut najoqqutarineqarsimasoq Qanilaassuseq ajunngitsortalerujussuaq unissimavoq, neriuutiginerarpaali tamatumuuna ataavartumik suliniarnertik ingerlalerumaartoq.
Paarisap imminornermut pinaveersaartitsineranut siunnersortit, Namminersornerullutik Oqartussanit ukiuni pingasuni tulliuttuni ukiumut 2 mio koruuninik aningaasaliiffigineqartassapput.