Nunaqarfiit arlallit depoteqarfinngortinneqariaannaapput

Pilersuisumi aningaasartuutit tulluarsaaffiginiarlugit Illoqqortoormiuni, Ittaajimmiut/Kap Hope matuneqassaaq, Moriusarlu depoteqarfinngortinneqarsinnaalluni, nunaqarfiit imminnut qanittut suleqatigiisinnerusinnaanersut aamma Pilersuisumit misissuiffigineqarput.

Pilersuisup naatsorsuutai malillugit nunaqarfiit 10 procentii ingerlalluarpallaanngillat. Nunaqarfiillu 53-jusut nalunngikkutsigu nunaqarfiit tallimat missaat ingerlalluarpallaanngitsutut eqqoriarsinnaavarput.

Tamannalumi aallaavigalugu Namminersornerullutik Oqartussanut isumaqatigiissutit malillugit nunaqarfiit ilaat depotinngortinniarneqarput ilaallu nunaqarfinnut qanigisaannut immikkoortortaqarfinngortinniarneqarlutik.

Pilersuisumik nunaqarfinnut immikkoortortaqarfimmut pisortaq Frederik Olsen ima nassuiaateqarpoq:

- Eqqarsaatigaarput Moriusaq depotinngortinneqarsinnaanera taanna Qaanaap Kommuneani eqqartorparput, kisianni matusoqarsinnaanera eqqarsaatigalugu uani Ittoqqortoormiut Kommuneani Ittaajimmi, tassa Kap Hopemi depotiusimasoq mannakkut qulit inorlugit inoqalersimasoq taanna matuniarparput.

- Taava aamma kujataani Saarloq allatut aaqqiivigineqarsinnaasoq takorloorutigivarsi?

- Takorloorutigaarput nunaqarfiit imminnut qanittut suleqatigiinnerulersinnaanerat maannakkut oqaatiginngilara Saarloq depotinngussasoq kisianni nunaqarfiit minnerit Sarlukkut Eqalugaarsuillu isumaqarpugut ingerlatsinikkut niuernikkullu pitsaanerusumik angusaqartoqarsinnaasoq.

Aammali nunaqarfiit aningaasatigut ullumikkut ingerlalluanngitsut privatinngorsaallutik pilersinnaagaluartut Frederik Olsenip oqaatigaa:

- Nalunngilarpummi aamma nunaqarfinni aamma angivallaanngikkaluartuni aamma kioskeqartoq aammalu taakkua kioskimik piginnittut imminnut napatissinnaappata taava sooq nunaqanni allani nammineq niuertarfeqarneq napatissinnaassanngilaat.