Ujajaasimasoq suli ujarneqarpoq
Nuummi taxartartup tallimanngormat unnuakkut angummit ujajaaffigineqarnerani takunnittuusimasunik politiit saaffiginneqqusipput. Politiit pisortaata tullia Johan Davidsen taama nalunaaruteqarpoq.
Nuummi Tuapannguani Blok S-ip eqqaani unnuakkut marlup missaani ujajaasoqarpoq. Taxap matua aquttup nalaaniittoq ammariarlugu aquttoq savimmik qunusaarneqarsimavoq aningaasanillu piumaffigineqarsimalluni. Aquttup aningaasivik qunusaarisumut tunniussimavaa.
Ujajaasimasoq ima isikkoqarpoq: angutaavoq kalaallisut oqaluttoq, 175 centimeterit missaanni angissusilik, tuattoq, taartunik qernertunilluunniit atisalik, kiinnani ilisarnarunnaarsarlugu nasarsimasoq immaqalu simertuulluni.
Ujajaasimasumik takunnissimasut, tusarsimasut imaluunniit arlaatigut ujajaanermik ilisimasallit politiinut saaffiginneqquneqarput, oqarasuaammut uunga: 32 14 48, tassalu 32 14 48.
Ujajaasimaneq, aalakkuttut angerlarsimaffinnilu eqqissiviilliortut eqqaassanngikkaanni sapaatip-akunnerata naanerani nunatsinni eqqissisimasoqarsimasoq politiit ilisimatitsipput.