Tunisassiorfik tamaviaarunneqarpoq

Ilimanami innuttaasut tunisassiorfitsik Nuka A/S-imit siorna tiguaat ukiorli siulleq iluatsitsiffiunngitsumik ingerlasimavoq, qerititsivittaartoqarneratigulli Ilimanarmiut tunisassiorfitsik neriunartoqarnerusumik ingerlalersinnaasoq neriuutigaat.

Siorna Ilimanarmiut tunisassiorfitsik Nuka A/S-imit tiguvaat nammineerlutik piginneqatigiillutik ingerlatilerniarlugu.

- Tassa ukioq siulleq aalisarfik silalu pissutaallutik oqarsinnaavugut immaqa iluatsitsinngitsoorpugut taama oqaatigigaanni immaqa pitsaaneruvoq. Ilimanami tunisassiorfiup pisortaa Arne Lange oqarpoq.

Ilimanarmiut arfineq-pingasut Iluliarmiullu sisamat piginneqatigiillutik Ilimanami tunisassiorfimmi ukiumut 4 tonsinik qullukkiortalerniarlutik pilersaarutigisimavaat. Iluatsitsinngitsoornerup kingunerisaanik tunniutiinnartoqassanerluni:

- Naamik tunniutiinnassanngilagut ingerlaqqinnissatsinnut maanna piareersimavugut aamma oqareernittuut qerititsiveqarnerit taakku iluarseriarpata siumungaaq qaleralinnik pisiortulereernissarput aamma naatsorsuutigilluinnarparput. Arne Lange oqarpoq, nangipporlu:

- Kisiannili una qerititsivik tunisassiornerup piaarnerusumik aallartissinnaanngornera taavalu makkutsillugu toqqorsiviugallarsinnaasutut igitsinissaq pinngitsoorniarlugu tamakkununnga iluaqutiginiartussaavarput uani tunisassiat amerlassusaannut sunniuteqarsinnaanera maannakkuugallartoq oqaatigiuminaappoq. Ilimanami tunisassiorfiup pisortaa Arne Lange oqarpoq.