Radioaviisimi tusagassiortussaaleqisoqarnera qalleqqissarpaa

Kalaallit Nunaata Radioani pisortaq, Lars Lennert Sandgreen, oqarpoq radioavisimi pissutsit pillugit isummersuutit ulluni kingullerni takkuttut pinngitsooratik tusaaniarneqartariaqartut, erseqqissaatigivaali radioaviisip aaqqissuisoqarfianni ajornartorsiutit oqaatsinut tunnganngimmata, tusagassiortussaaleqinerli ajornartorsiutaasoq:

- Tusagassiortussaaleqineq uani qitiulluinnarpoq. Feeriarfiup nalaani aggustip qaammataani akunnattoorsimavugut, isummersuutillu saqqummiunneqartut tusaallugit radioaviisimi pissutsit naleqqussaqqissavagut, Lars Lennert Sandgreen oqarpoq.

- Radioaviisimi pisut aallaavigalugit isummersuutit takkuttut eqqarsaatigeqqittarialinnik imaqarput, pisortatullu isumaqarpugut isumatusaarnerussasoq isummersuutit tamakku tusaallugit, tigullugit nutaarsiassaqartitsivimmik nukittorsaaqqissalluta, Lars Lennert Sandgreen oqarpoq.