A/S Inissiaatileqatigiiffiup INI-p sulisunut pisortaata Mogens Hansenip neriuutigaa, nakkutilliisoqarfimmut Securitasimut sianersinnaanissamik neqeroorut Nuummi atuutsinneqalersoq uninnani ingerlaannassasoq.
- Isumaga malillugu pitsaanerpaassagaluarpoq illoqarfiit annerit tallimat arfinillilluunniit taammaattumik aaqqissuussiffigineqartuugaluarpata, INI-mi sulisunut pisortaq Mogens Hansen oqarpoq, nangillunilu:
- Ajornartorsiummi inuit eqiteruffianni takussaaneruvoq, Mogens Hansen nassuiaavoq.
Neqeroorut maajip qaammataanili Nuummi misiligummik ingerlanneqalerpoq, maalaaruteqartartullu tallimariaammik amerlisimapput.
Ukioq manna qaammatit siulliit sisamat maalaaruteqartartut agguaqatigiissillugit qaammammut 20-usarsimapput, Securitasimullu sianersinnaalernerup kingorna maalaaruteqartartut agguaqatigiissillugit qaammammut 100-nngorsimapput.
Nakkutilliisoqarnerli akikitsuinnaanngilaq, Mogens Hansenillu kikkut aningaasaliisuussanersut qularutiginagu ima oqaatigaa:
- Annertunerusumik nakkutilliisoqassappat, taava ineqartut akileeqataasalernissaat saneqqutiinnarsinnaanngilagut.
Nuummi nakkutilliisoqarneq ingerlatiinnarneqassanersoq inissiaatileqatigiiffiup ukioq manna aalajangiiffigisussaavaa, taamaaliortoqareerpallu takorloorpaat illoqarfiit annerit allat taamatut aamma aaqqissuussiffigineqarsinnaassasut.
Illoqarfiit pineqartut tassaapput Ilulissat, Aasiaat, Sisimiut, Maniitsoq kiisalu Qaqortoq.