Mogens Lykketoft Mette Holm-ilu Qassiarsummi katittut
Socialdemokratit siulittaasorisimasaat Mogens Lykketoft arnaatinilu Mette Holm nunatsinni feriartillutik ippassaq Qassiarsummi katipput, ikinngutigilluakkaminnit inatsisartut siulittaasuannit Jonathan Motzfeldt-imit katitinneqarlutik.
59-nik ukiulik Mogens Lykketoft, 51-nillu ukiulik tusagassiortoq Mette Holm ukiup aappaata affaani aappareereerlutik ippassaq Qassiarsummi katipput, nulianngortullu kissaatigisimavaa nunatsinni katinnissartik.
-Kalaallit Nunaanni katinniarput Mette-p kalaallit ilisarisimammagit. Meerannguunerminit Kalallit Nunaat sungiusimavaa. Taamanikkut kalaallisut oqalulaartarluni inuuvoq, maannamullu attaveqaatini suli attappai, katinnialeramilu kissaatigisimavaa Kalaallit Nunaanni katinnissani. Mogens-ip tamanna akuerisimavaa naammassivarpullu taamaalillugu, Jonathan Motzfeldt oqarpoq.
Soorliuna Jonathan Motzfeldt katititsisoriniarsimagaat?
-Mette-p meeraallunili eqqaamavaa juullisioraangatta, taamanikkut palasissaallunga, uanga juullip evangeliuanik atuartartunga, juullerpalaartumillu oqaluussisartunga. Aamma Mette-p angajoqqaavisa qatanngutaasalu eqqaamavaat, oqartariaqarpungalu juullisioraangatta uanga juullerpalaartumik nalliussisarlugit, Jonathan Motzfeldt oqarpoq. Ilanngullugu oqaatigaa nuannaajallaatigisimallugu aperitikkami, Mogensimi ukiorpassuit suleqatigalugulu ikinngutigisimagamiuk.
-Suliassaq naammassigatsigu assut tamatsinnut nuannerpoq. Qassiarsummiut naalagiarput, Erik Røde Frederiksen pattattoralugu. Kingornatigut nunaqqatigiit katittut tunissuteqarfigaat, nuannerunaqaarlu taakkuulluni. Unnukkut issiagatta tamarmik ajunngilluinnartumik eqqartorpaat, oqarpullu inuunerminni misigisaminni nuannernerpaanut ilaatillugu, Jonathan Motzfeldt oqarpoq.
Mogens Lykketoft Mette Holmilu Kinami 1993-imi naapipput, ikinngutigeeqqaarsimapput Mogens Lykketoftilu kulturministeriusimasumut Jytte Hildenimut avinnermi kingorna aatsaat asannilerpoq, asanninnertillu pisortatigoortumik siorna saqqummiuppaat.
Mogens Lykketoft aamma Mette Holm katinnerminnut atatillugu sapaatip akunnera nunatsinni feriarput. Ullumi Igalikumukarput aqagulu Danmarkimut utissallutik.
