Angut quiasaarluni qaartartumik ippassaq nassataqarnerartoq timmisartoqqusaajunnaassagunarpoq
Angut 44-inik ukiulik Air Greenlandip nassatanik Kastrupimi tunnissisarfiani inunnik ippassaq qimagussuisitsisariaqalersimasoq, danskit timmisartoqarfiiniit sumiittunilluunniit qaquguluunniit timmisartoqqusaajunnaaratarsinnaavoq.
Nassatani tigummiaannagassani qaartartumik imaqarneralugu quiasaaraluni oqarnermi kingorna angut taanna Naalagaaffiup Timmisartuutileqatigiiffianut nalunaarutigineqarsimavoq. Quiasaarunni oqaatigaa timmisartoqarfimmi Kastrupimi sillimanissamut misissuisarfiatigoortilluni.
Quiasaareriaraluarnera taanna kingunipiloqartussanngorunarpoq, tassa siunissami Danmarkimiit qaquguluunniit timmisartumut ilaaqqusaajunnaarsinnaagami. Naalagaaffiup Timmisartuutileqatigiiffiata maanna aalajangertussanngussavaa, angut taanna Danmarkimi timmisartoqarfinniit angalaqqusaajunnaassanersoq.
- Taama ilungersunartigisumik piffissami maani quiasaarinissamut piffissaq eqqornerlunneqarujussuarpoq, nutaarsiassaqartitsivimmut Ritzauimut taama oqarpoq politiit pinerluttaalisitsisut Københavnimi ittuat, Carsten Holder.
Taama oqarnermini eqqarsaatigaa Londonimi peqqarniisaarujussuartoqarnerata kingunerisaanik Københavnimi upalungaarsimaneq annertusineqarmat.