Kangerlussuarmi sermersuup sisunerata sukkatsissimanera pimoorunneqartariaqartoq
Kangerlussuarmi sermersuup sisunerata sukkatsissimaneranik Greenpeacep kalerrisaarutaa, pimoorunneqartariaqartoq ICC sinnerlugu avatangiisit pillugit oqaaseqartartup Carl Christian Olsenip oqaatigaa.
Greenpeacep umiarsuaani Arctic Sunrise-mi ilisimatuut marluk marlunngormat avammut kalerriuteqarput, Kangerlussuup sermersuaa ukiumut 14 kilometerinik annertussusulimmik sisusarsimasoq, taamatuttaaq 5 kilometerimik tiffasinnerulersimasoq. 14 kilometerinik annertuseriarsimanera sukkassimaqaaq, tassami 1988-mi sisunera 5 kilometeriinnaasimagaluarmat. ICC-p avatangiisit pillugit oqaaseqartartua Carl Christian Olsen oqarpoq tamanna pimoorulluinnarlugu paasisariaqartoq.
Carl Christian Olsen nangilluni oqarpoq, silaannaap kissassusia 6 gradimik nikissimasoq. Erseqqissarpaalu Issittumi siunnersuisooqatigiit ICC-lu peqatigiillutik kingunissai piareersarnialersaaritik.
Carl Christian Olsen erseqqissaavoq mingutitsineq inuit pilersitarisimappassuk, tamatuma annikillisarneqarnissaa ICC-miit pingaartikkitsik. Taamatuttaaq erseqqissaavoq novemberimi Københavnimi ilisimatuut ataatsimeersualerpata tamanna eqqartorneqartussaanerarpaa.