Sermersuaq nikikkiartupiloortoq

Greenpeace-p umiarsuaani Arctic Sunrise-mi ilisimatuutut atorfillit sermersuaq pillugu marlunngormat paasisaqarsimasut, umiarsuup naalagaata Arne Sørensenip tusagassiutinut nalunaarutigaa.

Taakku paasisimavaat, Kangerlussuup eqqaani sermersuaq assut sukkasuumik nikikkiartortoq. Tamannalu silap pissusiinik aamma allanngortitsisimasoq.

Umiarsuaq Greenpeace-p sikunik aserorterutaa Arctic Sunrise aasaq manna nunatsinni angalavoq, issittumi silaannaap pissusaanik allanngoriartortoqarneranik uppernarsaatissamik takussutissarsiniarsaralutik.

Greenpeacemi ilisimatuut satellitsi aqqutigalugu uuttuut atorlugu uppernarsivaat Kangerlussuup eqqaani sermersuaq ukiumut 14 km-nik nikeriartarsimasoq, nikeriartarneq tamanna nunarsuarmi aatsaat taamak sukkatigisoq Greenpeacemi ilisimatuut oqaatigaat, tassami ukiut 20-t ingerlanerinnaani pingasoriaammik sukkanerummat.

Isumaqarpunga silaannaap allanngoriartorneranik ajornartorsiut pimoorullugu paasineqartariaqalersoq, nunallu tamalaat silaannarmik mingutitsinnginnissamik Kyotomi isumaqatigiissutaanni eqqartorneqartariaqalersoq. Pingaarnerpaavorlu USA-p paasisariaqalermagu, nunat tamalaat silaannarmik mingutitsinnginnissamik isumaqatigiissutaannut ilannguttariaqalernertik, taama oqarpoq Greenpeacep umiarsuaani Arctic Sunrisemi umiarsuup naalagaa Arne Sørensen.