Knud Rasmussenip Højskoliani ukiortaamiit pitsanngorsaasoqarnialerpoq

Meeqqat atuarfianni soraarummeerluni angusat naammaginngikkaanni Sisimiuni Knud Rasmussenip Højskoliani atuarluni soraarummeernertalimmik ukiortaamiit pitsanngorsaasoqarsinnaalissaaq.

Knud Rasmussenip Højskolianut qinnuteqartut affaasa ukiuni arlalinni apeqqutigisarpaat meeqqat atuarfianni karakteriminnik pitsanngorsaallutik soraarummeernertalimmik højskolimi atualersinnaanerlutik.

Taama oqarpoq Lars Olsvig Knud Rasmussenip Højskoliani pisortaq.

Meeqqat atuarfianni kalaallisut qallunaatullu angusarisimasat højskolernermi pitsanngorsarsinnaanissaat ukiortaamiit piviusunngortinneqalerpoq.

Sisimiuni Knud Rasmussenip Højskoliani atuartut meeqqat atuarfianni soraarummerutaasartut assigalugit kalaallisut qallunaatullu taamaalillutik soraarummeersinnaalissapput.

Kalaallisut qallunaatullu højskolimi ilinniartitsisoqarneq taamaalilluni atorluarneqalissaaq, fagilli allat, soorlu matematik tuluttullu atuarneq pitsanngorsarusunneqassappata ilinniartitsisut amerlisariaqassapput, Lars Olsvig erseqqissaavoq.

Knud Rasmussenip Højskoliani ukiortaamiit atuarusuttut oktobarip ulluisa 15-t nallertinnagu qinnuteqartussaapput.