Qaannamik unammersuarnerit pisortatigoortumik ingerlanneqartut ullumi naggaserneqarput. Naggasiutigalugulu unammissutigineqarpoq iligiikkaarluni parrunneq.
Meeqqani niviarsiaqqat Nuummiut pissartanngorput
Nukappiaqqani Iluliarmiut hold 2 pissartanngorput
Arnani Sisimiormiut pissartanngorput
Angutini Nuummiut hold 1 pissartanngorput
Unammersuarnerit ajunngitsumik ingerlasimasut qaannat kattuffianni siulittaasoq Jenseeraq Amondsen oqarpoq.
Pokalit ingerlaartartut unnugu naggataarnersiornissami tunniunneqassapput, kikkullu qajartullammanngornersut aamma saqqummiuneqassaaq.
Unammersuaarnerit naammassigaluartut aqagu takisoorsuarmik parrunnerit ingerlanneqassapput, tassanilu aningaasanik akissarsisitsisoqassaaq.