Nuummi naluttarfik Malik kuultinnattoq

Nuummi naluttarfik Malik titartaasartunik unammisitsinermi nunat tamat olympiadeqartarnermut komiteanit, IOC-mit kiisalu nunat tamat timersortarfeqarnermut kattuffiannit IAKS-imit kuultinnatsinneqarsimavoq.

Europami nunat allat arfineq-marluk timersortarfii peqatigalugit Malik kuultinnattoq Nuup Kommuniata nalunaarutigaa.

Unammersuartitsinermi kuultinnattut arfineq-pingasut saniatigut sølvinnattoqarlunilu bronzinnattoqarpoq.

Nuummi naluttarfik Malik 2003-mi septembarip qaammataani atoqqaarfissiorneqarpoq, tamatumalu kingorna iluatsilluartumik atorneqarluni.

Tamatumunnga takussutissaavoq atuutilernerminiit qaammatini siullerni sisamani 90.000-it missaanniittunit pulaarneqarsimagami.

Ullumikkut inuit 400-t 500-llu akornanniittut ullormut pulaartarput.

Malimmik titartaasuupput KHR Arkitekter A/S Nuummi titartaasarfik Tegnestuen Nuuk A/S suleqatigalugu.