Atammimmi olivinisiornissaq aallarteriaannanngorpoq

Atammiup eqqaani aatsitassamik Olivin-imik piaanissaq aallarteriaannanngorpoq, aatsitassamik piaasussat akuersissummik ullumi tunineqarmata.

Piaanissamut akuerineqarpoq Svenskit aatsitassarsioqatigiiffiat Minelco.

Piaanissamut sanaartugassatigut piareersarneq atortussanillu pisiniarnerit aallartereersut Minelcop allaffissornermut pisortaa Per-Erik Lindvall oqarpoq.

Atammimmi Olivin-imik piaanissaq Seqi Olivine A/S-imik taaguuserlugu ingerlanneqassaaq piaanertarpiaalu aggustip qeqqata missaani aallartissasoq, Per-Erik Lindvall ilisimatitsivoq.

Olivinimik piaanissamut pisortaq Jan Ivan Johanson oqarpoq Seqi Olivine 30-it 50-illu akornanni sulisoqarumaartoq, Johanson-illu neriuutiginerarpaa sapinngisamik nunaqavissut amerlasuut suliffissaqartikkumaaritik.

Sulissanut Maniitsumeersunut Atammimmeersunullu atatillugu Maniitsup borgmesteria Søren Lyberth, Jan Ivan Johanson-ip ataatsimeeqatigisimanerarpaa.