Siumumi siulersuusinerit allanngornerat
Siumut siulersuisuunerisa tuaviortumik ippassaq oqarasuaatikkut ataatsimiinneranni, Jonathan Motzfeldt siulittaasup tulliatut inissippoq.
Taamaalilluni 2001-imi Hans Enoksenimit siulittaasutut uppititaanermi kingorna Siumup partiip aqutsisuinut inisseqqippoq.
Siumumumi siulittaasup tullinngortoq, partiip nukittorsaqqinnissaanut suleqataanissaminut isumalluarpoq:
- Isumalluartuartuuvunga, massakkullu Siumut nukittorsaqqillugu ingerlaqqinnissarput ajorinngeqaara.
Aallaqqaataaniilli Siumumi ingerlatsinitsinni silittumik, inuppalaartumik kiisalu nuna manna tamatta angerlarsimaffigigipput tunngavigalugu ingerlatseriaaseq ingerlateqqissavarput, Jonathan Motzfeldt oqarpoq.
Jonathan Motzfeldt aamma oqarpoq, taama inissinnermini Hans Enoksenimut illuatungiuluttutut isigineqassanani. Siumup silittumik ingerlanini pissutigalu partiip iluani assigiinngitsunik isummertoqaraangat aqqutaasinnaasunik nassaarniartoqartarnerarlugu oqaatigalugu..
Siumup siulersuisuunerisa ulluinnarni aqutsisuini Mikael Petersen inissippoq.