Kangaatsiap Sisimiullu kommuneqarfiisa kattussinnaanissaat oqaluuserineqartoq
Kangaatsiap Sisimiullu kommuniini suleqatigiinnissaq komunneqarfinni aningaasaqarnermut ataatsimiititaliat ippassaq ataatsimiissutigaat.
Ataatsimiinnermi Sisimiut Kangaatsiallu kommuneqarfiisa siunissami kattussinnaanissaat imaluunniit suleqatigiilersinnaanissaat oqaluuserineqarput. Inuussutissarsiornikkut suleqatigiinneq, inuussutissarsiutinik ineriartortitsinermut periarfissallu eqqarsaatigalugit iluaqutaassasoq, Sisimiut borgmesteriat Hermann Berthelsen Kangaatsiallu borgmesteria Otto Jerimiassen isumaqarput.
Kommuneqarfinni taakkunani marlunni suut suleqatigiissutigineqarsinnaanissaat misissorneqassaaq.
- Nunaqarfinnut aggustimi angalasussaavugut inuit isumaannik tusarniaalluta, tamatuma kingorna Sisimiuni septembarimi ataatsimeeqqissaagut, Otto Jerimiassen oqarpoq.
Kangaatsiap Sisimiullu kommuniisa suleqatigiinnissaq pillugu oqaloqatigiinnermik saniatigut kommuneqarfinnik eqqaminniittunik aamma oqaloqateqarput.