SIS: Kina eqqortumik oqaluppa?
- Eqqortoq tusarliutiinnarnagu takutinneqartariaqalerpoq, Siumut kingullermik ataatsimeersuarneranut atatillugu immikkoortortaqarfiit akiliuteqarsimannginnerannik imaluunniit akiliuteqarsimanerannik, Siumumi siulersuisuni aningaaserisuusimasup Tønnes Berthelsen-ip Siumullu Nuummi immikkoortortaqarfiani siulittaasup Ole Berthelsen-ip isumaqatigiinngissuteqarnerannut Siumup inuusuttai taama qisuariaateqarput.
- Siumup ataatsimeersuarnera inatsisit malillugit ingerlanneqarsimanersoq, tassalu immikkoortortaqarfiit peqataasut tamarmiullutik akiliisimallutik taasisinnaatitaasimanersut uppernarsineqartariaqalerpoq, oqaasiinnaq atornagu takussutissalli tigussaasut atorlugit, Mads Petersen SIS-ip siulittaasua taama oqarpoq.
Mads Petersen-ip piumasaraa Siumup ataatsimeersuarnerani inatsisit malillugit ingerlatsisimasoqarpat uppernarsarneqassasoq, inatsisillu unioqqutillugit iliortoqarsimappat immikkut ittumik ataatsimeersuartoqassasoq.
- Siumut Nuup oqariartuutaa paasivarput, taamaammallu siulersuisuunerit siulersuisuunerusimasullu takussutissanik timitalinnik saqqummiussisariaqalerput, Mads Petersen oqarpoq.
Naalakkersuisut siulittaasuat Hans Enoksen radioaviisimut ippassaq oqarpoq Siumumi immikkut ataatsimeersuartoqarnissaanut Siumut akissaqanngitsoq.