Jens Napaattooq illuatungiliivoq

Naalakkersuisunut ilaasortaasimasoq Jens Napaattooq pisortat akiligaannik aningaasarpassuarnik atuisimaneragaanerminut maanna illuatungiliivoq.

Jens Napaattuup radioaviisimut oqaatigaa Siumup siulersuisuuneri ataatsimeeqatiserisimallugit.

Ataatsimiinnermi Jens Napaattuup atuisimaneragaanini nassuiaateqarfiginiarlugu oqaatigaa.

- 410.000 koruunit atorlugit fistinngilanga,

akiliinermilu kukkusumik kontoliisoqarsimavoq. Taakkua saniatigut nammineq annikitsunik kukkunerusariaqanngikkaluanik kukkussuteqarsimavunga, Jens Napaattooq oqarpoq.

Kukkunerusariaqanngikkaluit taasaasa ilagaat, Københavnimi atisaajaatigaluni qitittarfimmi 250 koruunit nalinginik pisortat akileeqataasimanerat.

- Akisussaaffiga sumiginnarsimavara. Uanga nammineq tamanna akisussaaffigaara, kukkussutimalu kinguneri akisussaaffigalugit tiguakka, Jens Napaattooq oqarpoq.

Ilanngullugu oqaatigaa, inatsisartut kukkunersiuinermut ataatsimiititaliaata misissueqqissaarnissaa kissaatigalugu.

Kukkussutaasariaqarsimanngikkaluit pillugit aningaasat taarserusunnerai aperineqarami Jens Napaattooq akivoq:

- Soorunami taarseruppakka.

Jens Napaattuup immiutitilluni apersorneqarnissani kissaatiginngilaa.