Tønnes Berthelsen: Pasilliinerit eqqunngillat

Siumut siulersuisuunerini aningaaserisuunerusimasoq Tønnes Berthelsen tusagassiuutitigut allagaqarluni nalunaarpoq februaarimi Siumup ataatsimeersuarnerani immikkoortortat marluinnaat piumasaqaatinik naammassinnissimanerannik pasilliinerit eqqunngitsuusut.

Siumup Nuummi immikkoortortaqarfiani siulittaasup tullia Ole Berthelsen arfininngormat Radioaviisimi oqarpoq partiip kingullermik ataatsimeersuarnerani immikkoortortaqarfiit amerlanersaasa unioqqutissimagaat, immikkoortortaqarfiit Nuuk Nanortalillu kisimik akiliisimasut oqaatigalugu.

Tamanna tunuaqutaralugu Ole Berthelsenip Siumukkormiut kajumissaarpai immikkut ittumik ataatsimeersuartoqaqqullugu.

Ilaasortaanermut akiliutissamik naammassinnittut aammalu ataatsimeersuarnermi peqataanissamut tapimik akiliisimasut kisimik ataatsimeersuarnermi peqataapput, Siumup partiiani aningaaserisuunerusimasoq Tønnes Berthelsen taama allappoq.