Tikaagulliusaartassat ikilineqarput
Kalaallit Nunaata tikaagulliusaartassaasa 19-it, Arfanniartarneq Pillugu Nunat Tamalaat Kommissionianni IWC-mi ataatsimeersuarnermi peqataasunit piumasarineqartoq malillugu Aalisarnermut Piniarnermullu Naalakkersuisup Rasmus Frederiksenip aappaagumit qulinut appartippai.
IWC-mi ataatsimeersuartut amerlanersaasa tikaagulliusaat kisinneqartarnerat naammaginagu kissaatigisimavaat, Kalaallit Nunaanni pisassiissutit ikilisinneqassasut. Aalisartut piniartullu kattuffiata KNAPK-p kissaatigisimagaluarpaa, nunatta arfattassai katillugit 175-it nikisinneqassanngitsut, tamannali maanna allanngortinneqarpoq.
- Ataatsimeersuarnermi nunatsinnut tunngassuteqartut oqaluuserineqangaatsiarnerat ilungersunarpoq, IWC-millu aarleqquteqarneq pissutigalugu pisassiissutinik appaavugut. Rasmus Frederiksen oqarpoq.
Nunatta tikaagulliusaartassaminik ikilisitsinera nunanit allanit nersualaarneqarlunilu iluarisimaarneqarpoq, Australiallu arfernik ingasaassilluni illersuiniartartutut IWC-mi ataatsimeersuartunit taaniarneqartartup, Kalaallit Nunaat pilluaqquaa, paasinnilluni tikaagulliusaartassanik ikilisitsisinnaasimammat.