IWC Koreami Kujallermi aqagumiit ataatsimeersualerpoq
Arfanniartarneq pillugu ataatsimiititaliarsuaq, IWC, aqagu ataasinngornermi 57-issaanik Koreami Kujallermi illoqarfissuarmi Ulsan-imi ataatsimeersuarluni aallartissaaq.
Nunat assigiinngitsut 61-it ataatsimeersuarnermi peqataatitaqassapput.
Danmark IWC-imut ilaavoq, taamaammallu Kalaallit Nunaanniit aamma peqataasoqassaaq.
Peqataasussanullu ilaavoq Aalisarnermut Pisortaqarfimmi pisortaq, Amalie Jessen.
Eqqartorneqartussanut pissanganarnernut ilaassaaq arfattassat, soorlu qipoqqaat tikaagulliusaallu, ikilisinneqarnissaannut japanimiut siunnersuutaat.
Japanimiut siunnersuutaat taanna Danmarkimit tapersersorneqarpoq.
Siunnersuut amerlanerussuteqartunit tapersersorneqassanersoq apeqqutaalissaaq. IWC-imut ilaasortat arlallit, soorlu Australia aamma New Zealand, arfanniarnermut akerliusorujussuupput.
Aammattaaq uumasunut nunarsuatsinni illersuiniaqatigiiffiit qisuariarnissaat ilimagineqarsinnaalluarpoq.
IWC-ip ataatsimeersuarnera tallimanngorpat junip ulluisa 24-ianni naammassineqassaaq.