Ilinniarnertuutut allagartartaartoqarpoq
Qeqqani Ilinniarnertuunngorniarfimmi Nuummiittumi ilinniarnerminnik naammassisut 53-it Minihalimi ullaatungaani allagartartaarput.
Kujataani Ilinniarnertuunngorniarfimmi Qaqortumiittumi 33-t aamma allagartartaaqqammerput, Avannaanilu Ilinniarnertuunngorniarfimmit Aasianniittumit 35-t nasartaaqqammerlutik.
Taamatuttaaq HHX-imi Qaqortumiittumi inuusuttut tallimat kiisalu Sisimiuni HTX-imi 19-t allagartartaarput.
Ilinniarnertuunngorniarfiit tamarmik ilinniartuutiminnut ukiut ingerlaneranni immikkut ittumik iliuuseqartarsimapput, taamaaliornikkut ilinniarnerminnik unitsitsiniarlutik eqqarsaateqalersimasut unitsitsinniartarsimallugit.
Assersuutigalugu Aasianni ilinniartut siornali nakkutigeqqissaarneqalersimapput, atuariartunngitsoortartut oqaloqatigineqartalersimallutik. Tamannalu ukiut siuliinut naleqqiutissagaanni iluaqutaasimasoq GU-mi inspektøri Birger Lundholm Sermitsiamut ilaatigut oqarpoq.