Aliortornartoqarnersoq apeqquserneqartalerpoq
Nunatta Katersugaasiviani nalaatsornerunerluni imaluunnit aliortortoqarnerluni ?
Apeqqut tamanna katersugaasivimmi Nuummiittumi apeqqutigineqartalersimavoq, saqqummersitat ”Kalaallit Nunaat sorsunnersuarlu kingulleq” pissutigalugit. Sermitsiami ullumi saqqummertumi tamanna allaaserineqarpoq.
Matumani assit marluk pineqarput, tassaallutik Avannaani naalagaasimasup Eske Bruunip aamma kujataani naalagaasimasup Aksel Svanep assingi.
Eske Bruun pissutsinik malinnaasuusimavoq, landsrådilu tunuliaqutaralugu pissusiulersut najoqqutaralugit nunatta ingerlanneqarnissaa siunniussimallugu. Aksel Svaneli qangatoortumik atorfilittut naalagarsiortuusimavoq, danskillu naalakkersuisuisa nazistinik suleqateqaqqusinera malinniarsimallugu. Angutit taakku marluk assigiinngeqisut taamani makunniunnerat taamaalilluni aallartissimavoq.
Angutit assingi sanileriisillugit Katersugaasivimmi kikissamut nivinngarneqarsimapput, sanileriikkumagunanngillalli.
- Eske Bruunip assinga natermut pingasoriarluni nakkarpoq, kiisa assip sinaa aserfallakkiartulerpoq. Saqqummersitsinermik aaqqissueqataasoq Jens Heinrich oqarpoq.
Suli paasineqanngilaq, asseq sooq nakkartarnersoq, nakkartuaannarpalli saqqummersitat aliortugaqarsimassagunarput, tamannalu sinerissami pilersaarutaareersumik saqqummersinneqarneranni paasinarsissaaq.