Pollitiinngorniat Nuup aqquserngini ullumi sungiusarput
Politiinngorniat upalungaarsimaniarnermut sungiusartut ullumi najuuffigaagut.
Aalakoorluni biilertoq ujaarineqarpoq, sungiusarneriinnaagaluarlunilu piviusorsiorpalaartutut isigalugu politiit sulipput.
Politiinngorniaq Uummannameersoq Taatsi Fleischer politiinngorniarnini ima nassuiaatissaqartippaa:
- Suliffik pissanganartuuvoq, allanngorartunik misigisassaqarfiusoq. Taavalu inuttut ineriartorsinnaanermut piginnaasallu ilaatigut misilinneqartaramik killissaat tikillugu, Taatsi Fleischer oqarpoq.
Taatsi Fleischerip politiinngorniarnini aalajangiusimallugu ilaminut ilisimatitsimmat, taakku Taatsimut oqarsimapput eqqarsaatigeqqittariaqaraa sumut isernialernerluni. Ataatsimut isigalugu paasinnissimapput tapersersorsimalluguli.
Politiinngorniat ualimut nalunaaquttap akunnerini marlunni aqqusinermiipput arlaleriarlutillu aalakoortuusaarluni biilertoq tigusarivaat.
